هل حققتى هدفك فى الحياة؟

كل بنت فى الدنيا بيبقى ليها اهداف واحلام بتحاول تحققها على الرغم من الصعوبات الى بتواجة البنات ساعات كتير فى مجتمعنا الشرقى والعربى, سواء كانت احلامها الدراسة , الجواز, العمل, كل حلم ساعات وكل هدف بيبقالة مشاكلة..
يعنى مثلا لو عندنا بنت قاعدة فى مجتمع ريفى والبنت دى يكون ليها طموح عالى جدا فى التعليم وانها تكمل تعليمها الجامعى وتحضر ماجيستير ودكتوراة؟ السؤال هنا هل البنت دى بتعرف تحقق طموحها ولا بتلاقى العادات والتقاليد بتجبرها على واقع تانى غير الواقع الى كانت متخيلاة ؟ يعنى اهل البنت حايسمحولها تكمل تعليمها و تسافر وتروح وتيجى ولا حايقولولها لا كفاية عليكى كدة البنت اخرتها الجواز؟
وبمناسبة الجواز ظاهرة بقت منتشرة جدا فى مجتمعنا وهى تاخر سن الجواز عند البنات ودة ساعات بيرجع لطموح البنت الزائد وتفكيرها فى مستقبلها التعليمى وبس
نرجع لموضوعنا حانفترض ان فية بنت طموحها انها تاخد شهادة من دولة اخرى؟ هل بتعرف تحقق الموضوع دة سواء كان مجنمعها مجتمع ريفى او مدنى؟ حانلاقى ساعتها ان فية اعتراضات كتيرة من جانب الاهل بتصل الى حد الرفض القاطع لاننا ما اتعودناش فى مجتمعنا ان البنت تسافر برة لوحدها تخيلوا بقى لو حاتعيش هناك كمان.
الطموح كلة مش طموح علمى لان اكبر طموح عند اكتر البنات هو الجواز وتكوين اسرة وفية بنات هدفها الاساسى دة
نوع تانى من انواع الطموح هو الطموح الوظيفى يعنى تكون البنت عايزة توصل لاعلى درجةمن درجات الترقية الوظيفية وانها توصل لاعلى المناصب , ودة ساعات كتير بيكون علية اختلاافات فى مجتمعنا علشان الثقافة الذكورية الى سايدة عندنا ونظرة المجتمع باستغراب للمراة لما نلاقيها وصلت وبقت قاضية ووزيرة وماذونة
انتى بقى من اية نوع من البنات الطموحة ولا الى معندهاش طموح ؟ وهل قدرتى تحققى طموحك؟ ولو ماقدرتيش اية المعوقات الى واجهتك؟
وحاتقدرى تتغلبى عليها ولا لا؟
مستنية ردودكم