المرة دي هنتكلم عن الشعر وانا بصراحة مش موافقة على عبارة ان االشعر هو تاج المراة بس دلوقتى العبارة الصح الحجاب هو تاج المراة.
أول حاجة لو اتكلمنا عن الموضة في قصات الشعر الحريمي هنلاقي إن الكاريه هو موضة الصيف السنة دي ولكنه موضة مبتكرة وجديدة ومختلفة عن الكاريه التقليدي فدلوقتي الأطراف من قدام بتكون طويلة أكتر من المنطقة الخلفية في الشعر.
بس المشكلة الوحيدة للقصة دي إن ما ينفعش إنها تتلم في الصيف فلو واحدة شعرها خشن وناوية تصيف مانصحهاش بالقصة دي لأنها مش هتعرف تلم شعرها
الشعر الليس"المفرود" السنة دي هو الموضة أكتر وبمناسبة فرد الشعر فيه طرق كتير غير طبيعية لفرد الشعر وكلها بتبوظ الشعر وكمان السيشوار والبيبي ليس والمكواة دول بيحرقوا الشعر علشان كده مانلجأش للأشياء دي غير في أوقات اللزوم فقط.
فلو عايزين نطري الشعر ممكن نعمل مرتين في الأسبوع حمام زبادي بالعسل لأن ده بيطري الشعر جدا وبيديه لمعة لكن ما بيفردهوش وأنا من وجهة نظري اللي شعرها مكسر مش مفرود تعتبر إن دي خلقة ربنا وتسيبه على كده لأنه في الغالب بيكون لايق على شكل وشها ولو بصينا لأهل أمريكا اللاتينة زي السيدات في البرازيل والأرجنتين هنلاقي إن شعرهم كيرلي وهما سايبينه كده وشكلهم حلو قوي وأرجوكم بلاش تقلدوا الممثلات والمطربات لأن دول فنانين وبيعملوا حاجات علشان تبهرنا مش أكتر وفي الآخر النتيجة صناعي في صناعي مش في الشعر بس ده في كل حاجة وأنتم فاهمين قصدي.
أهم حاجة إن السيدة أو البنت يكون عندها ثقة في نفسها شعرها مجعد جسمها مليان دايما تكون مبسوطة من نفسها ومالهاش دعوة بحد وماتبصش لحد.ما ينفعش تفرد شعرها علشان العريس ييجي وتاني يوم الدخلة تغسله والعريس يلاقي شعرها على حقيقته!!!!!!!يبقى خلينا في الطبيعي أحسن
أما بالنسبة لألوان الشعر الموضة فالألوان الطبيعية هي الموضة زي الأسود والبني وده زي السنة اللي فاتت. وبالنسبة للون الأصفر مابيناسبش المصريات لأننا أفارقة مش أوربيين. أما الهاي لايت خلاص مابقاش موضة مش بقولكوا خليكوا في الطبيعي أحسن ولو طالبة قوووي تغيير في اللون مفيش أحسن من الحنة لأن كل الصبغات فيها مواد كيماوية مضرة بالشعر والدليل على كده إن السيدات الحوامل ممنوع يستخدموا الصبغة.أما بالنسبة للسيدات المحجبات فدايما يحاولوا إنهم يفتحوا البلكونة أو أي شباك في البيت ويعرضوا شعرهم للشمس والهواء وأثناء تعرض الشعر للشمس والهواء يعملوا تدليك بأصابع اليد وللحفاظ أكتر وأكتر على الشعر نبعد عن الطرح البوليستر ونخلينا في الطرح المصنوعة من القطن لأنها أحسن.كمان زيت الجرجير وكل الزيوت الطبيعية مفيدة جدا للشعر.
No comments:
Post a Comment